Foutbòl : Kèk abit Ayisyen reklame jistis pou Evelyne Sincère !league-sport-plus

pa Caph Thiago GEFFRARD

Jounen dimanch 8 novanm 2020 an, ekip Cavaly AS la tap resevwa ekip FICA a nan pak Gérard Christophe nan okazyon 12èm joune chanpyona nasyonal premye divizyon pou sezon 2020 ak 2021 an.

Pou match sa a, enstans kap dirije chanpyona nasyonal yo te chwazi 4 abit sa yo pou dirije match sila, se Lowengens Joseph, Olrish Lapaix, Julio Georges ak Jean Rouchild Edmond.
4 mesye sa yo te reyalize yon jès ki te touche kè anpil moun avan ke match la te kòmanse. Jès la se te bande zye yo epi kwaze men yo nan lide pou mande abolisyon zak kidnapin ki ap pwodwi nan peyi a pandan dènye tan sa yo e sitou anlèvman, vyòl ak lanmò yon jèn elèv ki sot konpoze nan egzamen tèminal ki pote non “Evelyne Sincère”.

4 abit ki tap dirije match Don Bosco FC ak Triomphe AC a nan Pak Sainte-Thérèse ki twouve l nan Petyonvil te fè menm jès sa a tou.
Se te Richard Joassaint, Erick Jr Desgranges, Burrhomane Louicéus ak Guerbison Michel.

Yon fwa ankò, abit Ayisyen yo make prezans yo nan sa ki gen rapò ak revandikasyon sou dwa moun.

Pou rapèl, Cavaly AS genyen FICA (2-1) epi Don Bosco FC ak Triomphe AC fè (1-1).

Laisser un commentaire